Волгоград облаҫӗнче Чӑваш Енри икӗ строитель вилнӗ. Малтанлӑха пӗлтернӗ тӑрӑх, вӗсем сӗрӗмпе наркӑмӑшланнӑ. Кун тӗлӗшпе пуҫиле ӗҫ пуҫарнӑ.
Следстви комитечӗ пӗлтернӗ тӑрӑх, юпа уйӑхӗн 31-мӗшӗнче Котлубань поселокӗнче организацири пӗр ӗҫчен пӳрте кӗнӗ те виҫӗ арҫын сывламасӑр выртнине курнӑ. Иккӗшӗ – Чӑваш Енрен, тепри – Иркутск облаҫӗнчен. Арҫынсем унта ӗҫлеме килнӗ, пурӑнма ҫурт тара илнӗ.
Следстви комитечӗ пӗлтернӗ тӑрӑх, вӗсем сӗрӗмпе наркӑмӑшланса вилме пултарнӑ. Ахӑртнех, газ оборудованийӗ юсавсӑр пулнӑ.
Шали ӗҫсен органӗнче ӗҫлекен 34 ҫулти хӗрарӑм тӗлӗшпе пуҫиле ӗҫ пуҫарнӑ. Вӑл пысӑк укҫа вӑрлама тӑнӑ тесе шутлаҫҫӗ.
Следстви версийӗ тӑрӑх, юпа уйӑхӗн 13-мӗшӗнче вӑл пӗлӗшӗн 3,3 миллион тенкине хайӗн кӗсйине чикме хӑтланнӑ. Вӑл ӑна ҫак укҫапа икӗ пӳлӗмлӗ 4 хваттер туянма пулать тесе ӗнентернӗ.
Анчах йӗрке хуралҫи хура ӗҫне вӗҫне ҫитереймен. Ӑна Хӑрушсӑрлӑхӑн федераци службин тата Следстви комитечӗн Чӑваш Енри следстви органӗсен ӗҫченӗсем татса чарнӑ.
Халӗ ун тӗлӗшпе пуҫарнӑ уголовлӑ ӗҫе малалла тӗпчӗҫҫӗ.
Юпа уйӑхӗн 23-мӗшӗнче Шупашкарта нумай хутлӑ ҫурт ҫывӑхӗнче ҫамрӑк арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Пӑтӑрмах ирхи 5 сехет ҫурӑра пулса иртнӗ. Радужнӑй урамӗнчи 11-мӗш ҫурт патӗнче арҫын виллине тупнӑ. Вӑл 13-мӗш хутран ӳкни паллӑ.
«Про Город» хаҫата халӑх корреспонденчӗ пӗлтернӗ тӑрӑх, арҫын Етӗрне районӗнче ҫуралса ӳснӗскер пулнӑ. Вӑл савнӑ хӗрӗпе пурӑннӑ.
Следстви комитечӗ кун тӗлӗшпе тӗрӗслев ирттерет.
Шупашкарта нумай хутлӑ ҫурт ҫывӑхӗнче хӗрача виллине тупнӑ. Вӑл ҫӳллӗшӗнчен ӳкнӗ.
Ку пӑтӑрмах паян 14 сехет ҫурӑра Ленин Комсомолӗн урамӗнчи 27-мӗш ҫуртӑн 1-мӗш корпусӗнче пулнӑ. 13-14 ҫулсенчи пек курӑнакан хӗрача 10-мӗш хутри чӳречерен ӳкнӗ.
«Урампа пынӑ чухне тӑрук шаплатнӑ саса илтрӗмӗр», - тенӗ «Про Город» хаҫата халӑх корреспонденчӗсем. РФ Следстви комитечӗн Чӑваш Енри следстви органӗсем халӗ лару-тӑрӑва уҫӑмлатаҫҫӗ.
Улатӑрта 35 ҫулти арҫын сарӑмсӑр вилнӗ. Кун пирки Следстви комитечӗ пӗлтерет.
Юпа уйӑхӗн 3-мӗшӗнче 14 сехетре ҫамрӑк арҫын ҫурт патне канализаци пӑрӑхӗсене хунӑ чухне вилнӗ. Вӑл траншея тӗпӗнче пулнӑ, ун ҫине тӑпра йӑтӑнса аннӑ.
Арҫынна тусӗ шалусӑрах ӗҫлеме чӗннӗ. Ведомство кун тӗлӗшпе тӗрӗслев ирттерет. Следовательсем вырӑна тӗплӗн тӗрӗсленӗ, кӳнтеленсенчен ыйтса пӗлнӗ.
Юпа уйӑхӗн 3-мӗшӗнче Шупашкар районӗнчи Тутаркасси ялӗнчи пӗр хваттерте 3 ҫулти хӗрача виллине тупнӑ. Следстви комитечӗ кун тӗлӗшпе пуҫиле ӗҫ пуҫарнӑ.
Ку тискер ӗҫе амӑшӗ тума пултарнӑ тесе шутлаҫҫӗ. Следстви версийӗ тӑрӑх, 42 ҫулти хӗрарӑм авӑн уйӑхӗн 30-мӗшӗнче тата юпан 1-мӗшӗнче упӑшкипе, ҫав вӑхӑтра килте пулманскерпе, вӑрҫӑнса кайнӑ. Кун хыҫҫӑн вӑл хӗрне вӗлерме шутланӑ, пӗчӗкскере ҫемҫе япалапа хупласа сывлама паман. Кун хыҫҫӑн хӑй те пурнӑҫран кайма тӑнӑ.
Халӗ ҫав хӗрарӑм больницӑра выртать. Ҫитес вӑхӑтра ӑна тытса чарас ыйтӑва татса парӗҫ.
Ҫӗмӗрлере пурӑнакан 49 ҫулти хӗрарӑм тӗлӗшпе РФ Следстви комитечӗн Чӑваш Енри следстви органӗсем уголовлӑ ӗҫ пуҫарнӑ. Вӑл ҫынна вӗлернӗ тесе шутлаҫҫӗ.
Следовательсем тӗпчесе пӗлнине ӗненес тӗк, авӑн уйӑхӗн 24-мӗшӗнче каҫхине ҫак хӗрарӑм ӳсӗр пулнӑ, вӑл ҫӗҫӗ тытнӑ та пӗрле пурӑнакан арҫынна чиксе вӗлернӗ. Арҫын ҫавӑнтах сывлама пӑрахнӑ.
Хӗрарӑма тытса чарнӑ. Следстви вӑхӑтӗнче ӑна хупса усрасшӑн. Преступлени япалине – ҫӗҫҫе – ун ҫумӗнче тупнӑ.
Паян, авӑн уйӑхӗн 23-мӗшӗнче, кӑнтӑрла тӗлне Шупашкарта Иван Яковлев проспектӗнчи 8-мӗш ҫурт ҫывӑхӗнче хӗрарӑм виллине тупнӑ. Кун пирки «Про Город» хаҫата халӑх корреспонденчӗсем пӗлтернӗ.
Вырӑна следовательсем, полицейскисем, тухтӑрсем килнӗ. Судмедэкспертсем те пынӑ. Ҫынсем курнӑ тӑрӑх, ватӑ хӗрарӑм уҫӑлма тухнӑ та ӑна япӑх пулса кайнӑ. Вӑл 80 ҫулсенчи пек курӑнать.
РФ Следстви комитечӗн Чӑваш Енри следстви органӗсем кун тӗлӗшпе тӗрӗслев ирттереҫҫӗ.
Паян ҫӗрле Шупашкарта нумай хутлӑ ҫурт ҫывӑхӗнче хӗр виллине тупнӑ. Ку инкек Ленин Комсомолӗн урамӗнчи 25-мӗш ҫуртӑн 1-мӗш корпусӗ патӗнче пулнӑ.
«Про Город» хаҫата халӑх корреспонденчӗ пӗлтернӗ тӑрӑх, хӗр 23 ҫулта пулнӑ, вӑл 11 хутран ӳкнӗ. Вӑл ҫавӑнтах вилнӗ.
РФ Следстви комитечӗн Чӑваш Енри следстви управленийӗ хӗр мӗнле майпа ӳкнине тӗпчет.
Ҫурла уйӑхӗн 14-мӗшӗ, Пыл сӑпасӗ, Шупашкарта пурӑнакан 68 ҫулти хӗрарӑмшӑн инкекпе вӗҫленнӗ. Ҫак кун унӑн пурнӑҫӗ татӑлнӑ.
18 сехет те 40 минутра иртен-ҫӳрен хулари 9-мӗш Пилӗкҫуллӑх урамӗнчи 20-мӗш ҫурт ҫывӑхӗнче хӗрарӑм выртнине асӑрханӑ. Малтанах вӑл сывланӑ-ха.
Вырӑна васкавлӑ медпулӑшу ҫитнӗ. Унта реанимаци пулнӑ. Хӗрарӑма пульницӑна илсе кайнӑ. Анчах, шел те, тепӗр кунхине унӑн пурнӑҫӗ татӑлнӑ.
Следстви комитечӗ палӑртнӑ тӑрӑх, вӑл 3-мӗш хутран ӳкнӗ. Халӗ ӗҫ-пуҫа уҫӑмлатаҫҫӗ.
+1.3 °C